Calvo plantega un programa "valiente, rigurosu y con valores" pa siguir al mandu de FADE

Ferreira apuesta pola IA y la computación cuántica p'atayar la "lentitú burocrática"

La presidenta de la Federación Asturiana d'Empresarios (FADE) y candidata a la reelección, María Calvo, destacó esti llunes el programa “valiente, rigurosu y con valores", pegáu “a la realidá" col qu'aspira a llograr la victoria'l próximu día 11 d'abril, de manera que puea dar continuidá al trabayu fechu esti mandatu y contribuyir a dexar un legáu".

Sol eslogan ‘Una FADE con propósito. Una agenda para transformar Asturias desde la empresa’, Calvo presentó la so campaña na qu'apuesta por una patronal “independiente”, con “empreses fuertes”, colo que la comunidá “gana”.

Ferreira apuesta pola IA y la computación cuántica p'atayar la “lentitú burocrática"

El candidatu a la presidencia de FADE José Manuel Ferreira avanzó esti llunes que la Intelixencia Artificial (IA) y la computación cuántica van ser oxetu prioritariu na patronal asturiana que busca presidir a partir del próximu 11 d'abril, apostando por un proyectu "abiertu" qu'apurra una "fonda renovación y un cambéu d'aldu" frente al ciclu actual, que ve "escosu".

"Vamos esixir que na concertación s’integren estos recursos tecnolóxicos avanzaos pa poder poner fin a la lentitú burocrática, que tantu dañu fai al dinamismu económicu y a l'actividá empresarial", dixo na rueda de prensa na que presentó un programa de 25 puntos sol títulu 'La hora de los empresarios' col qu'aspira a la presidencia de la Federación, a la que tamién se presenta l'actual responsable, María Calvo.